आज रातिबाट माैन अवधि सुरु हुँदै, सामाजिक सञ्जालमा यी काम गर्न निषेध

मंसिर १, काठमाण्डौँ ।

यही म‌ंसिर ४ गते हुने प्रतिनिधिसभा र प्रदेशसभाकाे निर्वाचनलाई लक्षित गर्दै आज राति १२ बजेपछि मौन अवधि सुरु हुँदैछ ।

निर्वाचन आयोगले बिहीबार सूचना जारी गर्दै मौन अवधिमा गर्न नहुने कामहरूको सूची सार्वजनिक गरेको छ । जसमा आयोगले विशेषगरी सामाजिक सञ्जालका गतिविधिलाई ध्यानमा राखेको छ ।

आयोगले मौन अवधिमा सामाजिक सञ्जाल, अनलाइन, छापा वा अन्य कुनै पनि माध्यमबाट रणनीतिक दल वा उम्मेदवारको पक्ष विपक्षमा कुनै सन्देश, सूचना वा प्रचारप्रसार सामाग्री पोस्ट वा शेयर गर्न वा गराउन नपाइने जनाएको छ ।​

यसैगरी निर्वाचन प्रचार प्रसार तथा मत माग्नका लागि साउण्ड सिस्टम, शर्ट मेसेज सर्भिस (एसएमएस), सामाजिक सञ्जाल वा यस्तै कुनै साधन वा माध्यमको प्रयोग गर्न नहुने आयोगको भनाइ छ ।​

यसैगरी सामाजिक सञ्जालबाट गरिएका विज्ञापन, तथा निर्वाचन प्रचार प्रसार सामग्री १२ बजेअघि हटाइसक्नुपर्ने आयोगले निर्देशन दिएको छ ।

उक्त सूचनामा लेखिएको छ, “राजनीतिक दल तथा उम्मेदवार, दलका भातृ सङ्गठनहरूको सामाजिक सञ्जालमार्फत गरिएका विज्ञापन तथा निर्वाचन प्रचार प्रसार सामग्री हटाउनुपर्नेछ ।”